ਅਖਾੜੇ ਦਾ ਇਤਿਹਾਸ

ਅੱਜ ਦਾ ਸਮਾਂ

ਸਨ ੨੦੨੧ ਵਿੱਚ ਸ਼ਹੀਦ ਬਾਬਾ ਦੀਪ ਸਿੰਘ ਜੀ ਗੱਤਕਾ ਅਖਾੜਾ ਵਲੋਂ ਗੱਤਕੇ ਦੀ ਸਿਖਲਾਈ ਫੇਰ ਆਰੰਭ ਹੋਈ। ਸੱਭ ਤੋਂ ਪਹਿਲਾਂ ਬੀ. ਸੀ. ਦੀ ਰਾਜਧਾਨੀ ਸ਼ਹਿਰ ਵਿਕਟੋਰੀਆ ਵਿਖੇ ਅਖਾੜੇ ਦੀ ਸ਼ਾਖ "ਜੱਥਾ ਸੰਤ ਤੇਜਾ ਸਿੰਘ" ਸੀ ਸਥਾਪਨਾ ਹੋਈ। ਇਸ ਤੋਂ ਉਪਰੰਤ ਉਸਤਾਦ ਤੇਗਬੀਰ ਸਿੰਘ ਅਤੇ ਨਾਲ ਹੋਰ ਜੁੜੇ ਸੇਵਾਦਾਰਾਂ ਵੱਲੋਂ ਸਰੀ ਸ਼ਹਿਰ ਵਿੱਚ ਅਖਾੜੇ ਦੁਬਾਰਾ ਤੋਂ ਸਜਣ ਲੱਗੇ। ੩ ਗੁਰਮੁੱਖ ਪਿਆਰਿਆਂ ਦੇ ਬਰਸੀ ਸਮਾਗਮ ਸਮੇਂ ਸਨ ੨੦੨੧ ਵਿੱਚ ਉਸਤਾਦ ਚਰਨਜੀਤ ਸਿੰਘ ਜੀ ਦੇ ਕਨੇਡਾ ਵਿੱਚ ਕੀਤਾ ਗੱਤਕਾ ਪ੍ਰਚਾਰ ਬਾਰੇ ਸਿਲਕ ਰੋਡ ਪ੍ਰੋਡੱਕਸ਼ਨ ਕੰਪਨੀ ਵੱਲੋਂ ਇੱਕ ਡਾਕਊਮੈਂਟਰੀ ਫਿਲਮ ਤਿਆਰ ਹੋਈ ਜਿਸ ਦੇ ਵਿੱਚ ਅਖਾੜੇ ਨੇ ਵੱਧ-ਚੜ੍ਹਕੇ ਭਾਗ ਲਿਆ।

ਸਨ ੨੦੨੨ ਦੇ ਹੋਲੇ ਮਹੱਲੇ ਸਮਾਗਮਾਂ ਦੌਰਾਨ ਉਸਤਾਦ ਤੇਗਬੀਰ ਸਿੰਘ ਜੀ ਅਤੇ ਉਸਤਾਦ ਤੇਜਿੰਦਰ ਪਾਲ ਸਿੰਘ ਜੀ ਦੀ ਗੁਰੂ ਨਾਨਕ ਸਿੱਖ ਗੁਰਦੁਆਰਾ ਸਰੀ-ਡੈਲਟਾ ਵਿਖੇ ਮੁਲਾਕਾਤ ਹੋਈ। ਉਸਤਾਦ ਤੇਜਿੰਦਰ ਪਾਲ ਸਿੰਘ ਜੀ ਸੁਲਤਾਨਪੁਰ ਲੋਧੀ ਦਾ ਮੀਰੀ-ਪੀਰੀ ਗੱਤਕਾ ਅਖਾੜਾ ਦੇ ਸਵ: ਬਾਪੂ ਸੋਹਨ ਸਿੰਘ ਜੀ ਦੇ ਚੰਡੇ ਹੋਏ ਸ਼ਾਗਿਰਦ ਹਨ। ਸਨ ੨੦੨੨ ਤੋਂ ਉਸਤਾਦ ਤੇਜਿੰਦਰ ਪਾਲ ਸਿੰਘ ਜੀ ਅਖਾੜੇ ਵਿੱਚ ਸ਼ਾਮਲ ਹੋਏ। ਅੱਜ ਦੇ ਸਮੇਂ ਵਿਚ ਉਸਤਾਦ ਤੇਜਿੰਦਰ ਪਾਲ ਸਿੰਘ ਜੀ ਤੋਂ ਖਿਡਾਰੀ ਵਿੱਦਿਆ ਪ੍ਰਾਪਤ ਕਰਨ ਲਈ ਦੂਰੋਂ-ਨੇੜਿਓਂ ਚੱਲ ਕੇ ਆਉਂਦੇ ਹਨ।

​

ਬੀ. ਸੀ. ਦੇ ਸ਼ਹੀਦ ਬਾਬਾ ਦੀਪ ਸਿੰਘ ਜੀ ਗੱਤਕਾ ਅਖਾੜਾ ਵੱਲੋਂ ਇਸ ਸਮੇਂ ਸਰੀ ਅਤੇ ਵਿਕਟੋਰੀਆ ਵਿੱਚ ਸਿਖਲਾਈ ਦਿੱਤੀ ਜਾਂਦੀ ਹੈ। ਗੁਰੂ ਮਹਾਰਾਜ ਅਤੇ ਉਸਤਾਦਾਂ ਦੀ ਕਿਰਪਾ ਦੁਆਰਾ ਸਿੱਖ ਸੰਗਤਾਂ ਵਿੱਚ ਅਤੇ ਬਾਹਰਲੀਆਂ ਕਮਊਨਟੀਆਂ ਵਿੱਚ ਵੀ ਅਖਾੜੇ ਵੱਲੋਂ ਗੱਤਕੇ ਦਾ ਪ੍ਰਚਾਰ ਕੀਤਾ ਜਾਂਦਾ ਹੈ।

ਮਈ ੨੦੨੫ ਵਿੱਚ ਯੂ. ਐਫ. ਸੀ. ਦਾ ਸਾਬਕਾ ਮੈਂਬਰ ਅਰਜਣ ਭੁੱਲਰ ਵੱਲੋਂ ਅਖਾੜੇ ਨੂੰ ਇੱਕ ਪ੍ਰੋਫੈਸ਼ਨਲ ਮਾਰਸ਼ੀਅਲ ਆਰਟ ਇਵੈਂਟ ਦੌਰਾਨ ਗੱਤਕੇ ਦੀ ਪ੍ਰਦਰਸ਼ਨੀ ਕਰਨ ਲਈ ਸੱਦਿਆ ਗਿਆ।

ਉਸਤਾਦਾਂ ਅਤੇ ਗੁਰਮੁੱਖਾਂ ਦਾ ਸਤਿਕਾਰ

ਸ਼ੁਰੂ ਤੋਂ ਹੀ ਸ਼ਹੀਦ ਬਾਬਾ ਦੀਪ ਸਿੰਘ ਜੀ ਗੱਤਕਾ ਅਖਾੜਾ ਨੂੰ ਬਜ਼ੁਰਗਾਂ, ਗੁਰਮੁੱਖਾਂ ਅਤੇ ਉਸਤਾਦਾਂ ਨਾਲ ਸਾਂਝ ਪਾਉਣ ਦਾ ਮੌਕਾ ਮਿਲਿਆ। ਇਹ ਸਾਹਿਬ ਪਰਮਿੰਦਰ ਸਿੰਘ ਅਤੇ ਉਸਤਾਦ ਭਾਈ ਚਰਨਜੀਤ ਸਿੰਘ ਵੱਲੋਂ ਅਸੂਲ ਸਿਖਾਇਆ ਗਿਆ ਸੀ ਕਿ ਜਿਹੜੇ ਵੀ ਸਤਿਕਾਰਯੋਗ ਸੱਜਣ ਅਖਾੜੇ ਉਤੇ ਗੁਰਮਤਿ ਅਤੇ ਵਿੱਦਿਆ ਦੀ ਬਖਸ਼ਿਸ਼ ਕਰਨ ਨੂੰ ਤਿਆਰ ਹਨ ਉਨਾ ਦੇ ਅੱਗੇ ਹਮੇਸ਼ਾਂ ਨਿਵਕੇ ਚਲਣਾ ਅਤੇ ਪਿਆਰ ਨਾਲ ਅਖਾੜੇ ਵਿੱਚ ਸਾਂਝ ਪਾਉਣ ਲਈ ਸੱਦਾ ਦੇਣਾ।

​

ਇਸੇ ਪਰਕਾਰ ਅਖਾੜਾ ਹਮੇਸ਼ਾ ੳਸਤਾਦ ਬਾਬਾ ਮਹਾਂਵੀਰ ਸਿੰਘ ਜੀ ਅਤੇ ਉਸਤਾਦ ਬਾਬਾ ਗਿਆਨ ਸਿੰਘ ਦਾ ਰਿਣੀ ਹੈ ਜਿਨਾਂ ਨੇ ਬੇਅੰਤ ਗੁਰਸਿੱਖਾਂ ਨੂੰ ਸ਼ਸਤਰ ਵਿੱਦਿਆ ਦੀ ਦਾਤ ਬਖਸ਼ੀ ਅਤੇ ਬੀ. ਸੀ. ਦੇ ਸੂਬੇ ਵਿੱਚ ਸੱਭ ਤੋਂ ਸੀਨੀਅਰ ਉਸਤਾਦ ਹਨ। ਦੋਨੋ ਹੀ ਉਸਤਾਦ ਅਖਾੜੇ ਦੇ ਸੇਵਾਦਾਰਾਂ ਨੂੰ ਪਿਆਰ ਦੇ ਕੇ ਮਾਨ ਬਖਸ਼ਿਸ਼ ਕਰਦੇ ਹਨ ਅਤੇ ਕਾਰਜਾਂ ਵਿੱਚ ਆਪ ਜੀਆਂ ਤੋਂ ਸਿੱਖਿਆ ਅਤੇ ਸਲਾਹ ਲਈ ਜਾਂਦੀ ਹੈ।